کورونا وائرس کے باعث متحدہ عرب امارات (یو اے ای) میں قریباً دس ہزار پاکستانیوں کو نوکریوں سے فارغ کر دیا گیا ہے‘ جن کی وطن واپسی کیلئے انتظامات کئے جا رہے ہیں۔ 2018ء کی ایک رپورٹ کے مطابق ‘ بیرون ممالک سے اپنے ملک میں پیسہ بھیجنے والے دس ممالک میں پاکستان کا ساتواں نمبر ہے۔ دنیا بھر میں 80 لاکھ پاکستانی روزگار کے سلسلے میں مختلف ممالک میں رہائش پذیر ہیں‘ جن کا 28 فیصد مشرق وسطیٰ میں موجود ہے۔ تارکین ِوطن ہر سال لگ بھگ 20 ارب ڈالر سے زائد کا زر مبادلہ پاکستان بھیجتے ہیں ‘جو ملکی معیشت میں کلیدی کردار ادا کرتا ہے۔ وزیراعظم عمران خان وطن سے دور ان پاکستانیوں کو قیمتی اثاثہ قرار دیتے ہیں اور ان کی خدمات کا اعتراف کرتے ہوئے بیشتر اقدامات کا اعلانات کر چکے ہیں۔
