دراوڑ کے آباؤ اجداد کے احوال سے ہم ایسے ہی ناواقف ہیں جیسے کول لوگوں کے بزرگوں سے۔ ممکن ہے کہ دراوڑ دھات کے زمانے کے لوگوں کی اولاد سے ہوں۔ بعض عالموں کا یہ خیال ہے کہ دراوڑ شمال مغرب کے ملکوں سے برصغیر میں آئے۔ زمانہ دراز تک شمالی ہند میں آباد رہے اور کول سے لڑتے بھڑتے جنوبی ہند میں جا داخل ہوئے۔ بعضوں کا یہ خیال ہے کہ دراوڑ جنوب سے آ کر برِصغیر میں داخل ہوئے مگر جنوب میں کہاں سے؟ اس بارے میں بھی دو آرا ہو سکتی ہیں۔ ایک یہ کہ وہ اس بڑے ملک سے آئے تھے جو کسی زمانے میں ہند کے جنوب میں دور تک بحر ہند میں پھیلا ہوا تھا، مگر اب سمندر میں بیٹھ جانے کی وجہ سے نظر نہیں آتا۔
دوسری یہ کہ وہ ان جزیروں سے آئے تھے جو ایشیا کے جنوب مشرق میں آسٹریلیا تک پھیلے ہوئے ہیں اور ماضی میں خشکی کے ذریعے اس سے ملے ہوئے تھے، مگر اب وہ خشک زمین سمندر میں ڈوب گئی ہے۔ دراوڑ مویشیوں کے بڑے بڑے گلے رکھتے تھے۔ انہوں نے وہ گنجان بن کاٹے، جن سے ملک پٹا پڑا تھا۔ زمینیں صاف کیں اور ان میں کھیتی کیاری کا کام شروع کیا۔ یہ گائوں میں رہتے تھے۔ ہر ایک گائوں کا ایک مقدم یا مُکھیا تھا۔ گائوں کے سب لوگ اس کی اطاعت کرتے تھے۔ سانپوں اور درختوں کو بھی پوجتے تھے۔ وہ اپنے دیوتائوں سے محبت نہیں کرتے تھے بلکہ ان سے ڈرتے تھے، اور ان سے دعا اور التجا کرتے تھے تو اس بات کی کہ انہیں نقصان اور ایذا نہ پہنچائیں۔
