پاکستان کے ڈاکٹر اور طبی عملے کے دوسرے ارکان جس بےجگری و جاں فشانی سے اپنے ہم وطنوں کو کورونا کی مہلک وبا سے بچانے کے لیے سرگرم عمل ہیں، اس کے ذریعے بلاشبہ انسانیت سے محبت اور ملک و قوم کی خاطر ایثار و قربانی کی لازوال تاریخ مرتب ہو رہی ہے۔ ملک میں کورونا کا پہلا مریض کم و بیش پونے دو ماہ قبل منظرِ عام پر آیا تھا ۔ کووِڈ انیس کے متاثرین میں اضافے کے ساتھ ساتھ ملک بھر کے اسپتالوں میں طبی عملے کی مصروفیت بھی مسلسل بڑھ رہی ہے۔ ہمارے ڈاکٹر اور ان کے معاونین دن رات اپنی جانیں خطرے میں ڈال کر اس متعدی مرض کا شکار ہو جانے والوں کی زندگیاں بچانے کی جدوجہد کر رہے ہیں جبکہ اس کے نتیجے میں ملک کے مختلف حصوں میں درجنوں ڈاکٹر اور طبی عملے کے دیگر ارکان وائرس کا شکار ہو چکے ہیں۔
