روس سے چین تک جانے والی گیس پائپ لائن ’سائبیرین پاور‘ کا روسی حصہ موسم سرما کے آغاز کے ساتھ ہی بروقت مکمل ہو گیا ہے۔ ماہرین کے مطابق سیاسی طور پر یہ پیش رفت روسی صدر ولادیمیر پوٹن کے لیے ’خوشی منانے کا اہم موقع‘ ہے۔ اس موقع پر روسی صدر پوٹن نے اپنے چینی ہم منصب شی جن پنگ کے ساتھ ایک ویڈیو کانفرنس بھی کی، جسے روسی ٹیلی وژن پر براہ راست دکھایا گیا۔ اس ویڈیو کانفرنس میں صدر پوٹن نے کہا، ''اس پائپ لائن کی تعمیر صرف روس اور چین کے لیے ہی نہیں بلکہ پوری دنیا میں توانائی کی منڈی کے لیے بھی حقیقی طور پر ایک تاریخی واقعہ ہے۔‘‘
ہزاروں کلومیٹر طویل اس منصوبے کے تحت چین کو روس سے قدرتی گیس کی فراہمی زیادہ سے زیادہ بھی 2023ء تک شروع ہو جائے گی۔ روس نے اس پائپ لائن کو جو نام دیا ہے، وہ روسی زبان میں 'سِیلا سِیبیری‘ ہے اور اس کا اردو میں مطلب 'سائبیریا کی طاقت‘ بنتا ہے۔ اس پائپ لائن کے ذریعے یہ گیس روس سے چین کے شہر شنگھائی تک پہنچائی جائے گی۔ چین کے ریاستی علاقے میں اس پائپ لائن کی مجموعی لمبائی تین ہزار کلومیٹر بنتی ہے اور اس منصوبے کا چینی حصہ اگلے تقریباﹰ تین برسوں میں مکمل ہو جائے گا۔ نیوز ایجنسی ڈی پی اے کے مطابق اس منصوبے کے لیے روس اور چین نے مل کر کئی برسوں تک تیاری کی تھی۔ اس پر کام کا آغاز 2014ء میں ہوا تھا۔
