پاکستان، فنانشل ایکشن ٹاسک فورس کی گرے لسٹ میں

واشنگٹن سے سفارتی ذرائع نے دعویٰ کیا ہے کہ پاکستان کو باقاعدہ طور پر دہشت گردوں کی مالی معاونت کرنے والے ملکوں کی گرے لسٹ میں شامل کر لیا گیا ہے۔ رپورٹ اگرچہ غیر مصدقہ ہے کہ فنانشل ایکشن ٹاسک فورس (ایف اے ٹی ایف) کی جانب سے کوئی اعلامیہ سامنے نہیں آیا، تاہم ذرائع کا کہنا ہے کہ ایسا ہو چکا ہے۔ 1989 میں قائم ہونے والے ادارے ایف اے ٹی ایف میں امریکہ، برطانیہ، چین اور انڈیا سمیت دنیا کے 35 ممالک شامل ہیں۔ 2000 کے بعد سے وقتاً فوقتاً یہ ادارہ ایسے ملکوں کے ناموں کی فہرست جاری کرتا ہے جو اس کے خیال میں کالے دھن کو سفید اور دہشت گردوں کی مالی معاونت کرتے ہیں۔

فروری 2018 میں ایف اے آئی ایف کا پیرس میں اجلاس ہوا تو اس میں بھارت اور امریکی کاوش سے پاکستان کا نام گرے لسٹ میں شامل کرنے کی کوشش کی گئی لیکن پاکستان کی سفارتی مہارت کے باعث پاکستان کو تین ماہ کی مہلت دے دی گئی۔ اگر پاکستان کا نام واقعی گرے لسٹ میں شا مل ہو گیا تو یہ اس کے لئے ایک بڑا اقتصادی، سفارتی و سماجی دھچکا ثابت ہو سکتا ہے، پاکستان کے مالیاتی اداروں کے ساتھ تعلقات متاثر ہوں گے، بحالی امن کے باوجود سرمایہ کاروں کو پاکستان لانا مشکل ہو گا اور پاکستان آنے والی ہر پیمنٹ یا سافٹ لون کی کڑی چھان بین ہو گی۔ 

پیرس کانفرنس کے بعد پاکستان میں ایک صدارتی آرڈیننس کے ذریعے اقوم متحدہ کی طرف سے دہشت گرد قرار دی جانے والی بلکہ دیگر کئی تنظیموں کے خلاف بھی ایکشن لیا گیا اور انہیں کالعدم قرار دے کران کے مراکز و مدارس تک تحویل میں لے لئے گئے لیکن بھارت کی سفارتکاری نے اپنا کام دکھایا جس کے نتائج ہمارے سامنے ہیں۔ پاکستان کو اس صورتحال سے نکلنے کے لئے دو محاذوں پر کام کرنا ہو گا، اولین محاذ سفارتکاری کا ہے، دنیا کو ان اقدامات سے آگا ہ کرنا ہوگا جو پاکستان نے کئے ہیں۔ دوسری جانب ایسے مزید عملی اقدامات کرنا ہوںگے جو دنیا کو نظر آئیں۔ متحرک و موثر سفارتی اقدامات کرکے خود پر لگنے والے الزامات کو غلط ثابت کرنا ہو گا۔

اداریہ روزنامہ جنگ