یہ 1999 کی بات ہے جب لیری پیچ اور سرگئی برین نے گوگل کو ساڑھے سات لاکھ ڈالرز میں ایک حریف سرچ انجن کو فروخت کرنے کی پیش کش کی تھی۔ یہ دونوں اس وقت کیلی فورنیا کے نواحی علاقے میں دو کاروں کے لیے بنے گیراج سے کمپنی چلا رہے تھے۔ لیری اور سرگئیاس وقت لیگو سے بنا ایک کمپیوٹر سرور استعمال کر رہے تھے۔ اتنے کم سرمائے سے آغاز کے باوجود انھوں نے ’دنیا بھر میں قابل رسائی اور قابل استعمال‘ سرچ انجن بنانے کا دعوی ٰکیا تھا اور وہ اس سے فائدہ اٹھانا چاہتے تھے۔ گوگل کا یہ ممکنہ خرید کنندہ دنیا کا دوسرا بڑا سرچ انجن ایکسائٹ تھا۔ اس وقت پہلے نمبر پر یاہو تھا لیکن اس کے سی ای او جارج بیل نے فیصلہ کیا کہ گوگل کو خریدنے کا کوئی فائدہ نہیں۔
جارج بیل نے 2015 میں ایک انٹرویو کے دوران کہا: ’میرے خیال میں ہم نے اس وقت جو فیصلہ کیا تھا وہ درست تھا لیکن اب ایسا کہنا بہت مضحکہ خیز ہو گا۔‘
ساڑھے سات لاکھ ڈالرز کی اس ناکام ڈیل کے پانچ سال کے اندر ہی گوگل کی قدر 23 ارب ڈالرز تک جا پہنچ چکی تھی اور اب 20 سال بعد یہ ایک ٹریلین ڈالرز مالیت کی حامل کمپنی ہے۔ کئی لوگوں کے نزدیک یہ اکیسویں صدی میں فری مارکیٹ سرمایہ دارانہ نظام کی کامیابی کی چند بہترین کہانیوں میں سے ایک ہے، جبکہ کئی لوگوں کے لیے یہ ناکامی کی ایک داستان ہے، ایک ایسا عفریت جو قابو سے باہر ہو چکا ہے۔ ان کے بقول گوگل کا مقصد لوگوں کو معلومات تک رسائی دینا تھا لیکن اب اس کا نیا مقصد لوگوں کی معلومات اکٹھی کرنا اور منافع کمانا بن چکا ہے۔
![]()
لگ بھگ 20 سال تک گوگل میں سب سے مشہور کاروباری جملہ تھا ’ ڈونٹ بی ایول‘ یعنی برے مت بنو ، لیکن 2018 میں پرائیویسی سکینڈل اور صارفین کا اعتماد توڑنے کے الزامات کے بعد کمپنی نے خاموشی سے یہ جملہ اپنے کاروباری ضابطہ اخلاق سے حذف کر دیا۔ اب یہ کمپنی صرف سرچ انجن تک محدود نہیں بلکہ یہ ٹیکنالوجی کی دنیا میں ایک دیو بن چکی ہے، جو مصنوعی انٹیلی جنس کے استعمال سے لے کر ڈرون ڈیلیوری تک تمام خدمات فراہم کر رہی ہے۔ اب یہ صرف گوگل نہیں کہلاتی بلکہ 2015 کی ری سٹرکچرنگ کے بعد الفابیٹ کے ماتحت آچکی ہے۔ اسی چھتری تلے اب یہ کمپنی آن لائن دنیا کے ہر شعبے پر مکمل اجارہ داری قائم کر چکی ہے۔ اس کے کروم براؤزر کے پاس مارکیٹ کا 63 فی صد حصہ ہے جبکہ اس کا اینڈروئیڈ موبائل آپریٹنگ سسٹم 90 فیصد سمارٹ فونز میں استعمال ہو رہا ہے۔
