اگر کسی شہری کو انٹرنیٹ پر ہراساں کیے جانے، فراڈ، دھوکہ دہی یا اس طرح کی کوئی اور شکایات ہوں تو وہ ایف آئی اے کی ویب سائٹ پر موجود سائبر کرائم شکایات سیل کا ایک فارم پر کر کے اسے آن لائن جمع کرا سکتا ہے۔ یہ ایک انتہائی آسان عمل ہے۔ اس کے علاوہ شہری اپنی شکایات تحریری طور پر ایف آئی اے کے مجاز دفاتر میں بھی جمع کرا سکتے ہیں۔ درخواست موصول ہونے کے بعد شکایت کنندہ کو ایف آئی اے کے طلب کرنے پر مجاز افسر کے سامنے پیش ہونا پڑتا ہے اور اپنے ساتھ پیش آنے والے واقعے سے متعلق تفتیشی افسر کو ثبوت مہیا کرنے ہوتے ہیں۔
ایف آئی اے کا افسر شکایت اور ثبوتوں کا جائزہ لینے کے بعد یہ فیصلہ کرتا ہے کہ اس پر سائبر کرائم قانون کے تحت کیا کارروائی کی جاسکتی ہے۔ کئی معاملات انکوائری کی سطح پر ہی حل ہو جاتے ہیں لیکن اگر تفتیشی افسر کو یہ یقین ہو کہ یہ معاملہ واقعتاً قانون کی گرفت میں آتا ہے تو انکوائری مکمل کر کے ایف آئی آر درج کی جاتی ہے اور معاملہ عدالت میں چلا جاتا ہے۔ ایف آئی اے کے سائبر کرائم کا مانیٹرنگ یونٹ اسلام آباد میں واقع ہے جو غیرقانونی سرگرمیوں پر نظر رکھتا ہے۔ اس میں پیمرا، پاکستان ٹیلی کمیونیکیشن اتھارٹی اور دیگر انٹیلی جنس ایجنسیوں کے ساتھ مل کر کام کیا جاتا ہے۔
