برطانیہ اور فرانس کے درمیان 1337ء سے 1453ء تک جاری رہنے والی ایک جنگ کو ’’سو سالہ جنگ‘‘ کہا جاتا ہے حالانکہ یہ 116 سال جاری رہی تھی۔ جنگ کا سب سے بڑا سبب یہ تھا کہ فرانس کے بادشاہ چارلس چہارم کا 1328ء میں انتقال ہو گیا اور اس کی وفات کے بعد فوری طور پر کوئی مرد وارث موجود نہیں تھا۔ اس کا کوئی بیٹا تھا نہ بھائی جو تخت سنبھال سکتا۔ اس حقیقت کے پیش نظر برطانیہ کے بادشاہ ایڈورڈ سوم نے ارادہ کیا کہ وہ فرانس کا بادشاہ بن جائے۔ ایڈورڈ سوم کا فیصلہ فرانس کے عوام کے لئے قابل قبول نہیں تھا کیونکہ وہ ایک غیرملکی بادشاہ نہیں چاہتے تھے۔ دوسری طرف فرانس کے فلپ ششم نے کہا کہ اسے ہر صورت بادشاہ بننا چاہیے ۔
قانون کے مطابق عورت حکومت نہیں کر سکتی تھی۔ یہ بھی کہا جاتا ہے کہ انگریزوں نے فرانسیسیوں کے خلاف بعض نفرت انگیز محاورے بنائے وہ بھی اس جنگ کا پیش خیمہ بنے۔ یہ محاورے آج بھی استعمال کئے جاتے ہیں ۔ اسی طرح فرانسیسیوں میں بھی انگریزوں کے خلاف غصہ موجود ہے۔ فرانس میں انگریزی زبان میں گفتگو کو اچھا نہیں سمجھا جاتا۔ یہی وہ بنیادی اختلافات تھے جو دونوں ملکوں کے درمیان اس قدر شدت اختیار کر گئے کہ وہ جنگ پر آمادہ ہو گئے۔ جنگ کے آغاز میں فرانس زیادہ مضبوط تھا۔ آبادی ایک کروڑ 70 لاکھ تھی جبکہ برطانیہ کی آبادی صرف چالیس لاکھ تھی۔ آخر کار ایڈورڈ سوم کو نہ چاہتے ہوئے بھی فلپ ششم کو فرانس کا بادشاہ تسلیم کرنا پڑا۔ لیکن اس نے ان علاقوں پر قبضہ کرنے کا حق محفوظ رکھا جن پر زبردستی قبضہ کیا گیا تھا۔
