چین نے امریکہ سے درآمد کی جانے والی 128 اشیا پر 25 فیصد تک محصول عائد کر دیا ہے۔ چین نے درآمدی محصول میں اضافہ صدر ٹرمپ کی جانب سے سٹیل اور المونیم کی امریکہ میں درآمدات پر محصول کے اضافے کے جواب میں کیا ہے۔ نامہ نگاروں کا خیال ہے کہ محصول میں اضافے سے تین ارب ڈالر کی درآمدات متاثر ہوں گی۔ چین نے کہا ہے کہ یہ اقدام 'چینی مفادات کے تحفظ'اور امریکہ کے نئے محصول سے ہونے والے نقصانات کے سلسلے میں 'توازن پیدا کرنے'کے لیے کیے گئے ہیں۔ اس سے قبل چین نے کہا تھا کہ وہ تجارتی جنگ نہیں چاہتا لیکن اگر ان کی معیشت متاثر ہوتی ہے تو وہ خاموش نہیں بیٹھے گا۔
![]()
صدر ٹرمپ نے زور دے کر کہا تھا کہ 'تجارتی جنگیں اچھی ہوتی ہیں'اور امریکہ کے لیے یہ جنگ جیتنا آسان ہو گا۔ نامہ نگار کرس بکلر نے واشنگٹن سے بتایا ہے کہ امریکی حکام نے پہلے ہی دسیوں ارب ڈالر کے چینی درآمدات پر محصول لگانے کے منصوبے کا اعلان کر رکھا ہے۔ ان کا کہنا ہے کہ یہ چین میں تجارت کے ناجائز عمل کے جواب میں کیے گئے اقدام ہیں کیونکہ اس سے امریکی کمپنیاں متاثر ہوتی ہیں۔ نامہ نگار کا کہنا ہے اس کے علاوہ تجارتی جنگ میں'جیسے کو تیسا'کے مصداق مزید اقدام کے امکانات ہیں۔ امریکہ سے آنے والے سکریپ المونیم اور خنزیر کے فروزن گوشت پر حالیہ محصول کے علاوہ اضافی 25 فیصد محصول لگائے جائیں گے۔ اس کے علاوہ نٹس، تازہ اور سوکھے پھل، جنسینگ اور شراب کے محصول پر 15 فیصد کا اضافہ ہو گا۔ سٹیل کے لپٹے ہوئے سریے یا سلاخوں پر بھی 15 فیصد محصول کا اضافہ ہو گا۔
